Mondiai de Schi alpin 2029: Gherdëna sará la candidata dla Talia

La dezijiun é gnüda tuta incö a Milan dala FISI. Contënc le presidënt Arno Kompatscher y l’assessur Daniel Alfreider: “I orun desmostré che ara vá da orgnisé evënc sostenibls.”

Gherdëna é ofizialmënter la candidata taliana por organisé i Mondiai de Schi alpin dl 2029. La dezijiun é gnüda comunicada incö ai 9 de setëmber a Milan dal Consëi dla Federaziun Taliana Sporc da d’Invern (FISI). Sëgn podará Gherdëna, che ti l’á sticada ala concurënza de Sestriere, fá le proscim vare é presenté la candidatöra ofiziala ala Federaziun mondiala di Schi (FIS). Punc de forza dla candidatöra sará le sparagn de ressurses y l’adoranza de infrastrotöres bele esistëntes te na cornisc de sostenibilité y inovaziun.

Le presidënt Arno Kompatscher, competënt a livel provinzial ince por le sport, é contënt de chësc bun resultat che á ponü la fondamënta por jí ala proscima fasa. “I sun sigüsc che al é poscibl da organisé gares respetan l’ambiënt. Porchël él ince la Provinzia che sostëgn cun conviziun plëna la candidatöra de Gherdëna”. Por ciafé n arat positif ince dala FIS él de plü criters da tó en conscidraziun y che reverda aspec liá ala sostenibilité. “I podun adoré implanc portamunt bele fac sö y pistes bele esistëntes cun lapró na gran esperiënza di organisadus dla Copa del Monn de Gherdëna. En colaboraziun cun la FISI y dötes les perts interessades laorun sëgn por porté te Gherdëna i Mondiai de Schi alpin dl 2029”, á dit Kompatscher.

Ince l’assessur ladin Daniel Alfreider é contënt dla dezijiun da incö: “Gherdëna á na gran tradiziun por ci che reverda gares de schi de Copa dl Monn y á bele organisé i Mondiai de Schi tl 1970. Chësta esperiënza é n vantaje por organisé n evënt sciöche i Mondiai de Schi alpin 2029. Al sará ince d’atres canidadates, porchël sarál da lauré cun paziënza y conviziun.”