Provinzia fej na cunvenzion cun Chemun de Bulsan

Provinzia sustën Chemun per i custimënc dla manifestazions che taca adum cun la defileda paralimpica cun sauté cun chentli ai 27 de fauré

BULSAN (USP). Puech do la fin di Juesc Olimpics da d’Inviern Milan-Cortina iel bele sun l prugram la proscima manifestazion dal sport: i Juesc Paralimpics da d’Inviern dai 6 nchin ai 15 de merz ie ënghe a Cortina y a Milan. Y nce Südtirol ie leprò cun set atlec, y oradechël ti dajerà Bulsan, la capitela dla provinzia, ai 27 de fauré albierch al chentl paralimpich te si viac tres la Talia, de 2.000 chilometri, dai 24 de fauré nchin ai 6 de merz.

Per la urganisazion dla festa de bënunì sun Plaza Walther stlujerà la Provinzia ju na cunvenzion cun l Chemun de Bulsan. N ucajion de na senteda straurdinera dla Jonta provinziela ai 20 de fauré ie l presidënt dla Jonta provinziela Arno Kompatscher unì nciarià a sotscrì la cunvenzion. Cun chësta giapa l Chemun de Bulsan n sustëni finanziel da pert dla Provinzia. “L ie na gran legrëza a pudëi saludé te Südtirol nce l chentl paralimpich, do chël olimpich. Chësc chentl ncurpurea valores mpurtanc coche unità, ntlujion y la forza de ti vester a rëms,” da coche auza ora l presidënt dla Jonta provinziela Arno Kompatscher.