Social media

La Provinzia autonoma de Bulsan, damoinla ti dijons Provinzia, nfurmea la zitadines y i zitadins tres plataformes social desferentës y scialdi nuzedes y nvieia la cumenanza a fé pea pra la descuscion sun chisc canai y a spartì y se giamië ora i cuntenuc.

Sun i profii social ufiziei dla Provinzia vëniel publicà tresora y do y do nfurmazions n con’ dl’ativiteies y dla dezijions dla Jonta provinziela, y oradechël tesć y fotografies che à da n fé cun ntraunides, manifestazions y scumenciadives.

La Provinzia ie atualmënter prejënta sun chësta plataformes social: Facebook, Instagram, LinkedIn, TikTok, WhatsApp y YouTube.

- Facebook: Provinzia Bulsan - Provincia Bolzano - Land Südtirol

- Instagram: provinzia.bulsan - provincia.bolzano - land.suedtirol

- YouTube: Provinzia Bulsan - Provincia Bolzano - Land Südtirol

- LinkedIn: Autonome Provinz Bozen - Provincia autonoma di Bolzano

- TikTok: Provinzia Bulsan

- WhatsApp: Land Südtirol – Provincia Bolzano

I aconc ufiziei cumpedei su tlo dessëura vën manejei dal’Agentura de stampa y comunicazion.

I cuntenuc publichei sun i social media dla Provinzia à mé carater nfurmatif. La comunicazion tres i social media ne à nia la valuta de na comunicazion leghela o ufiziela dla Jonta provinziela ala cumenanza.

Codesc de cumpurtamënt (netiquette)

La netiquette ti dà dant ai anuzadëures coche i à da nteragì sun i canai social dla Provinzia. La dà dant n valguna normes de cumpurtamënt che duc i anuzadëures muessa tenì ite.

La netiquette à si fundamënta tl respet reziproch: la Provinzia ie davierta al dialogh y ala minonghes desferëntes, ma ne lascia nia pro che l ti vënie frit permez dut ncrëusc y zënza maniera. Dutes y duc vën nviei a schivé na rujeneda da se n avëi mpermel a livel persunel, che pruvochée y che sibe ufensciva, a respeté i autri anuzadëures y de tenì cont di prinzips fundamentei azetei dala sozietà. Razism, xenofobia, descriminazions che à si fundamënta tla religion, tla ravises etniches, tl gënder, tl urientamënt sessuel y nsci inant ne vën nia tulerei. L ne vën nia azetà che l vënie izenà ala viulënza. I cuntenuc publichei ne daussa nia jì contra i dërc de terzi, la privacy y la sfera persunela di ndividuums. L ne vën nia lascià pro retlam o spam che unirà riesc tëuc y tres.

La finamira prinzipela ie chëla de avëi n tlima online positif, che sibe dut ntëur nfurmatif y che respetée la cumenanza y i anuzadëures di canai social dla Provinzia Autonoma de Bulsan.

Cunseguënzes de anuzamënt fauz

L'Agentura de stampa y comunicazioni ie respunsabla dl manejamënt di canai social dla Provinzia y te chësta si ncëria muderéiela i comentares y la descuscions, se resservan te uni mumënt l dërt de:

• ne respuender nia a cumentares nia sun mesura

• tò y tres cumentares nia sun mesura y ufenscifs

• fermé o tò y tres i profii di anuzadëures che va for inò contra l codesc de cumpurtamënt (netiquette)

• mustré su y comuniché viulazions pesoces de viers dl codesc de cumpurtamënt sun i social media.

Tl cajo de cumpurtamënc scialdi griefs se resservéiun nce l dërt de mëter a jì azions legheles.

Scunanza di dac

Ai account social dla Provinzia se làscel jì permez dala plata internet www.provinzia.bz.it tres cunliamënc ipertestuei prejënc tl header y tl footer dla plata internet

Per scuné la privacy di utënc ne tol i cunliamënc ai canai social prejënc sun la plates internet dla Provinzia nia ite cookies de terza pertes. Mé sce n fej n click atif sun l cunliamënt ipertestuel ven l anuzadëur inò adressà ala plataforma social dedora, ulache l muessa dé dant si preferënza n con’ de cookies relatives ala plataforma social nstëssa, de chëla che la Provinzia ne n’ie nia respunsabla.

Uni social network à defati na si politica de manejamënt di dac persunei, che se lascia cunsulté tla sezion “Privacy” dla plataforma social singula.