Mobilité y ZTL ti raiuns UNESCO, Alfreider a Roma

L’assessur á tut pert ala Comisciun politica Infrastrotöres, Mobilité y Guern dl Teritore dla Conferënza Stat-Regiuns. N confrunt cun le MIT sön le Ju de Frara.

ROMA (USP). La mobilité, i trasporc publics locai y la gestiun di flusc dl trafich ti raiuns sensibli é stá al zënter dl iade a Roma dl assessur provinzial por la Mobilité y les Infrastrotöres Daniel Alfreider, che á tut pert ai laurs dla Comisciun politica Infrastrotöres, Mobilité y Guern dl Teritore dla Conferënza Stat-Regiuns.

Tratan la reuniun él gnü traté danter l’ater le tema dl cost dl ciarburant tl trasport publich local, na chestiun importanta ince por la mobilité südtiroleja y por la sostignibilité dl sorvisc publich söl teritore. En gaujiun dla sentada á Alfreider incunté Mario Casillo, vizepresidënt dla Regiun Campania, cun delega a Trasport, Mobilité y Mer. Tratan le confrunt á i dui vizepresidënc aprofondí deplü tematiches de interes comun por la mobilité tles döes regiuns, fajon referimënt ince ales ZTL (Zones a Trafich Limité) raionales.

Chësta tematica é spo stada tl zënter de na incuntada spezifica cun le sotsecreter de Stat dl Minister dles Infrastrotöres y di Trasporc, Tullio Ferrante. Tratan le colloquium él gnü aprofondí le percurs de sperimentaziun metü a jí dai Comuns dla Val Badia y de Gherdëna, dal grup de esperc y dala Provinzia por la istituziun de na ZTL raionala sön le Ju de Frara. Le confrunt toma ite tl cheder dles novités preodüdes dal Codesc dla Strada nü, che vëiga ince la poscibilité da istituí na ZTL te raiuns cun na contrada y na natöra de valüta particolara, te nosc caje n raiun Unesco. “Te raiuns de gran valüta ambientala y turistica, sciöche les Dolomites o la Costa incër Amalfi, é la gestiun di flusc de trafich na sfida concreta y tres plü atuala”, sotrissëia Alfreider. Porchël él important da lauré adöm, partí esperiënzes y costruí soluziuns balanzades, bones da sconé le teritore y da garantí tl medemo tëmp la mobilité, l’azessibilité y la cualité de vita. “Le percurs metü a jí sön le Ju de Frara nasc dala colaboraziun cun i Comuns, n grup de esperc y cun le teritore”, injunta l’assessur. “Al é n proiet che se damana confrunt, responsabilité y n cheder normatif tler. L’obietif n’é nia limité, mo gestí damí: smendrí la presciun dl trafich, olache al é debojëgn, y sconé n patrimone unich sciöche les Dolomites”.

Le iade a Roma é sté n’ocajiun por renforzé le confrunt istituzional cun Stat, Regiuns y Minister dles Infrastrotöres y di Trasporc, cun le fin da promöie na mobilité plü moderna, sigüda y sostignibla.