Puntac, metüda en segurëza sön la SS 244: laurs defata stlüc jö

Ai röia tosc a piz i laurs por mëte en segurëza le toch de strada statala 244 dla Val Badia dlungia Puntac. L’assessur provinzial ales Infrastrotöres Alfreider sotrissëia l’importanza dl’opera.

BADIA (USP). Ai röia tosc a conclujiun i intervënc por dortoré y mëte en segurëza la strada statala dla Val Badia (SS 244) tla localité Puntac, tl Comun de Badia.

Intervënc, insciö dij l’assessur provinzial ales Infrastrotöres y ala Mobilité Daniel Alfreider, che vá debojëgn por ti garantí plü segurëza ala strada: “Le toch de strada dla Val Badia en corespondënza de Puntac passa tres na costa instabila che á patí deplü roes ti agn passá. Ultimamënter, por mioré la segurté, él gnü fat n gröm de intervënc tl cheder de n proiet complessif, cun le fin da stabilisé la strada le miú che ara vá”.

Le contest y le fin dl intervënt

Sciöche l’Ofize tecnich strades nord-ost cunta, é le terac de chël raiun en gran pert metü adöm da majira, moscedé cun de gragn toc de crëp. Le sotfunz de crëp stabil é indere dër sot, plü o manco a 50-60 metri de profondité. Les inrescides y le monitoraje á relevé movimënc dl terac a deplü profondités, da püc metri cina sura i 30 metri, gaujiá ince dala presënza d’ega tl sotfunz y dales gran plöies.

Deache les carateristiches geologiches ne pormët nia da archité daldöt le movimënt dla costa intiera, s’á l’intervënt conzentré sön le mëte en segurëza la strada originara, adatan süa posiziun y süa altëza, por mioré la stabilité y smendrí i intervënc de manutenziun.

Les operes realisades

Le cantier s’á damané deplü intervënc por stabilisé la costa, mëte en segurëza la strada y arvëne les eghes. Al é gnü realisé de gragn mürs de sostëgn che ti garantësc plü stabilité ala strada. Al é gnü realisé sistems de drenaje nüs y restauré chi che ê bele. Le plann dla strada é gnü alzé de chi 70 zentimetri, por le porté zoruch ala altëza originara. Al é gnü metü en segurëza i raiuns atocá dala roa, stlüt les sfësses y impradí i rogns por limité l’infiltraziun dl’ega dla plöia. Implü él gnü metü jö y adaté dötes les rëis y i sorvisc esistënc.

Tratan chisc laurs á les gran plöies aumenté te na manira nia preodüda i movimënc dla costa söpert, ci che á porté pro che al jiss debojëgn ciamó n iade de intervënc de consolidamënt.

L’investimënt complessif por i laurs amunta sö a 2.800.000,00 euro. Do n valgügn laurs mëndri de restrotoraziun, é le colaudo formal dl’opera preodü por l’aisciöda 2027.