La Scora de musiga dla Val Badia complësc 50 agn

Cinch dejenars de scora de musiga dla Val Badia: Conzert da festa tla Ciasa dla cultura a La Ila - Le pröm diretur Lois Ellecosta cunta de n ri scomenciamënt y dles desfidades di pröms agn

BADIA (OSP). Ai 16 de ma él gnü festejé i 50 agn dla Scora de musiga dla Val Badia cun n conzert da festa tla Ciasa dla cultura a La Ila: Do la daurida dl conzert cun la musiga de stromënc a fle de scolars y scolares da sëgn y da dandaia dla scora de musiga á le diretur dla scora de musiga Raimund Pitscheider saludé i ghesć d'onur y döta la jënt che é gnüda al conzert: le degan siur Iaco Willeit, i ombolc dla Val Badia, le diretur dl'Intendënza y Cutura ladina André Comploi, la direturia dla scora de musiga provinziala Alexandra Pedrotti, l'Intendënt dla scora ladina Heinrich Videsott, le pröm diretur dla scora de musiga dla Val Badia Lois Ellecosta y siur Iaco Ploner, che alda pro i fondadus dla scora de musiga dla Val Badia. La manifestaziun é gnüda moderada dal vizediretur dla scora de musiga Renzo Huber. Al é gnü dit, che la scora de musiga dla Val Badia ti ciara zoruch cun bravöra,  a mez secul de ativité, olache al é gnü ispiré y sostigní generaziuns de porsones apascionades de musiga

Le diretur dl'Intendënza y Cultura ladina André Comploi á cunté te so discurs dla boniscima colaboraziun danter l'Intendënza ladina y la direziun provinziala dles scores de musiga todësces y ladines y á alzé fora l'importanza dla formaziun musicala por la jonëza.

Lois Ellecosta, le pröm diretur dla scora de musiga dal 1976 al 1987, á cunté dl ri scomenciamënt y dles desfidades di pröms agn. Al á ince nominé i tröc maestri y les tröpes maestres che s'á dé dassënn da fá i pröms agn.

Te n duo de clavier cun scolars y scolares di pröms agn dla scora de musiga él sté da aldí le diretur dla scora de musiga da incö Raimund Pitscheider. Le cor dla scora y l'orchestra sot la bachëta de Bruno Rives á porté dant n revival de na ciantia di pröms agn dla scora de musiga y döes cianties ladines adatades por l'ocajiun. I maestri y les maestres da sëgn é jüs sön paladina cun n cor, che á porté dant na ciantia ladina, n trio de clavier y n otet de stromënc a fle. L'inclujiun á ince n rode important tla scora de musiga dla Val Badia: I scolars y les scolares cun dejabilité á soné te n ensemble de fabló cun d'atri scolars y d'atres scolares de fabló la Oda ala ligrëza de Beethoven. Le scolar de chitara Mark Planinschek á fat na sorpresa cun Fantasie 5th Symphony Untitled Solo de Beethoven/Patrzalek; y spo á scolars y scolares soné stromënc a percusciun y n ater grup i orghi da man.