Sculeies de artejanat artistich pra l simposium de scultura te Fascia

David Pitscheider y Jonas Puff à fat na scultura che mostra su l raport danter la natura da mont y la nfluënza dla persona

URTIJËI/POZA DE FASCIA (USP). Uni doi ani vëniel metù a jì te Fascia, plu avisa via Poza de Fascia, n simposium di scultëures tl lën, dedicà al artista, nseniant y arpizadëur ladin Toni Gross. Chëst ann àl fat pea, dlongia sculeies y sculées dl Lizeum d'Ert de Fascia, de Trënt, de Udin y dla scola "Giovanni Pascoli" de Bulsan, nce doi sculeies dla scola prufesciunela provinziela per l artejanat artistich "La Prufesciunela" de Urtijëi.

I sculeies dla 4. tlas dl curs de spezialisazion tl ziplé David Pitscheider y Jonas Puff à, cumpaniei dal prufessëur de ziplé Patrick Senoner, laurà n'ena alalongia te na maniera ntensciva pra na scultura de n ciuch de zirca 180 zentimetri. L cunzet y l dessëni ie de David Pitscheider. La scultura se dà ju cun l raport danter la natura da mont uriginela y la fazion ch la persona à de viers de ëila. Ntan che tl tòch dessot dla scultura iel unì lascià si scorza naturela, vën la pert dessëura laureda ora y fineda su for plu y plu a puntin. La furmies reprejentedes simbulisea la persones che se muev te grupes y va ite tla cuntreda da mont. La furmies che ie tl prim plastiches vën do y do for plu y plu plates, fajan nscila referimënt al ntervënt for majer y majer dla persones de viers dla natura. N troi da raides lecorda i troies da mont y cunlieia i elemënc singuli dl lëur.

Dlongia l lëur ntenscif pra la scultura à l simposium nce pità l‘ucajion per se giamië ora cun d'autri artisć jëuni y artistes jëunes, y n generel cun la scoles che à fat pea. Nce vijites a scultëures y artisć dl raion iel stat sun l program, danter l auter na vijita te berstot de Matthias Sieff. Pra na mëisa turonda iel oradechël nce unì rujenà dla ndesfidedes dl turism de massa.