Di dla scola ladina - Inauguraziun dl ann de scora 2024/25 te Sëlva

Le tema metü tl zënter dla festa de inauguraziun é sté chël dla inteliënza artifizi ala y de sü adorvanza tl monn dla formaziun.

SËLVA (USP). Ai 30 de agost él sté la daurida ofiziala dl ann de scora 2024/2025 por les scores y les scolines ladines de nosta provinzia. Le tema metü tl zënter dla festa de inauguraziun é sté chël dla inteliënza artifizi ala y de sü adorvanza tl monn dla formaziun.

Le Vizepresidënt dla Provinzia y assessur por la Formaziun y Cultura Ladina, Daniel Alfreider, ti á sport de beles parores de bëgngnü ai rapresentanc dla politica locala, al personal dirigënt, ai insegnanc y ales insegnantes y a döt le personal dla scora ladina: "La scora dess insigné da imparé. Scolars y scolares stá tl zënter dl’atenziun, y i maestri é i esperc che arvënn y acompagnëia le prozes formatif. Ai á le compit da promöie y svilupé i talëc individuai y le potenzial uman che é ite te vigni möt y te vigni möta."

Le referat sura l’inteliënza artifiziala y süa adorvanza te scora á descedé gran interes danter le publich. Le prof. Gino Roncaglia, dl’Université Tre de Roma, á splighé che "tl tëmp de püc agn él baraté feter döt cant, por ci che reverda l’inteliënza artifiziala. Al é porchël dër important che ince la scora se fejes n valgönes domandes söla natüra de chësta tecnologia, sön sü vantaji y sön sü prighi, y che ara ti trasmëtes na dërta informaziun ai plü jogn y ales plü jones." Do le referat él sté tëmp por ti fá domandes al professur Roncaglia y por ciafé d’atri stlarimënc.

Le Di dla scola ladina é sté ince l’ultim dé de laur por l’Intendënta ales scores ladines, Edith Ploner, che lascia la dirigënza dles scolines, dles scores y dla cultura ladina do 43 agn de sorvisc. Chëstes, danter les atres, é les parores che ara ti á sport ai presënc: "L’inauguraziun dl ann de scora nü rapresentëia – por dötes les porsones che fej pert dl sistem formatif ladin – n’ocajiun da se incunté y da se sintí pert dla comunité scolastica ladina, che é unida, busiënta y vitala, ince sce ara é cotan picera. Al é n’ocajiun por ponsé plü sot al significat dl’educaziun, por ciafé la forza da s’un tó sura y da superé les sfides che la vita te scora mët dant vigni de."

Chësc ann de scora 2024/2025 registrëia 609 iscriziuns tles scolines ladines, 1.183 iscriziuns tles scores elementares, 629 tles mesanes, 490 tles scores altes y 28 iscriziuns tla scora profescionala. Indöt él porchël 2939 mituns y mitans che metará man les leziuns ai 5 de setëmber.