Curs de formaziun por l’abilitaziun da insigné tles scores elementares

Le curs de formaziun por l'abilitaziun da insigné por les classes dles scores elementares mët man d’agost dl 2022. Iscriziuns cina ai 24 de forá.

La Junta provinziala á aprové ai 31 d’agost dl 2021 le curs de formaziun nü por l’abilitaziun da insigné tles scores elementares ladines y todësces. Chësc curs de formaziun ará na dorada de trëi agn y metará man d’agost dl 2022. Les iscriziuns é davertes cina ai 24 de forá dl 2022.

Le curs de formaziun gnará organisé dala Intendënza Scora y Cultura ladina adöm al Departimënt Scora todëscia dla Provinzia y sará n curs de podëi fá tratan che an laora. Do avëi stlüt jö cun suzes le curs ciafará i partezipanc y les partezipantes l’abilitaziun da insigné. Le curs de formaziun ará na pert de teoria y na pert de pratica. Les condiziuns por tó pert é danter l’ater n’eté di candidac y dles candidates de almanco 30 agn, l’ejam de maduranza y d’atres condiziuns d’azes che pó gní lites do sön les plates internet dla Intendënza ladina y dl Departimënt Scora todëscia.