Ski-college dl ITE "Raetia": Finanziamënt mplu per sustenì i sportifs

L’Intendënza ladina à tëut la dezijion de ti dé n’asseniazion mplu de 100.000 euro al Istitut Tecnich Economich "Raetia" de Urtijëi, che cun la sezion sport mëina l "ski-college".

Cun l aumënt dl finanziamënt de 100.000 euro ala scola auta "Raetia" uel l’Intendënza ladina dé n senial sterch de sustëni a chi che ie scrit ite tla sezion sport. "L ski-college dl ITE de Urtijëi ie na bona ucajion per sculées y sculeies che uel se dé ju a na maniera intensiva cun l sport da d’inviern y tl medem tëmp fé na scola auta", dij l Assessëur provinziel per la Furmazion y Cultura ladina.

L’Intendënta ala scoles ladines Edith Ploner lecorda che chësc finanziamënt ti mpermët ala scola de pité ala families n servisc de training plu stabil tl tëmp, per garantì inant che la jëunes y i jëuni posse fé training a n livel de cualità for plu y plu aut. L alenamënt tol ite training sibe "sut" che sun purtoi, nce sun dlacieres, y cumporta nce l acumpaniamënt pra la partezipazion a garejedes, ti stajan nsci do ala sculées y ai sculeies ntan dut l ann.

Te chësc mumënt iel ndut 81 sculées y sculeies scric ite tla sezion sport dl Istitut Tecnich Economich "Raetia" a Urtijëi.