N dé straordinar por la cultura ladina

Di dla Cultura Ladina, ai 21 de setëmber, á pité n program desvalí cun leteratöra, ert, musiga y momënc interatifs cun n focus sön i mic y les liëndes

SAN MARTIN DE TOR (LPA) Le Di dla Cultura Ladina, metü man da doman cun n convëgn scientifich, á arjunt süa colm tl tert domisdé cun la zerimonia de surandada dl pröm Pest Merit Ladin.

“Dilan de cör por osta dediziun y osc amur por le lingaz ladin” á dit le diretur dl’Intendënza y Cultura Ladina, André Comploi, tla laudatio por la pröma porsona che á ciafé le reconescimënt Pest Merit Ladin, le linguist Lois Craffonara. “Dilan de osta capazité de persujiun y de osta artgën da orëi jí tres sot ales chestiuns, zënza mai se archité al livel superfizial y zënza trascuré valch. Dilan por l’ispiraziun y por ester n ejëmpl de porsona che crëi tles gran idees, che ne lascia mai da fá domandes y vá inant tla inrescida.”

L’assessur provinzial, Daniel Alfreider, á alzé fora che cun la surandada dl pröm Pest Merit Ladin a Lois Craffonara él gnü zelebré n de important por la cultura ladina: “Mi respet sintí ti vá a Lois Craffonara, che á dé n contribut fondamental ala inrescida y al svilup dl lingaz y dla cultura ladina cun so operé straordinar - che vá sura i confins provinziai fora. La scoltöra ’N liber da chël ch’al nasc d’atri libri‘ cun chëra che l’artist Gregor Prugger á davagné le concurs Ert X Merit Ladin, é simbol de nosta cultura ladina che se müda tresfora. I rengraziun les döes iuries y le Künstlerbund de Südtirol por so contribut de gran valüta. N dilan particolar ti vá al diretur dl’Intendënza y Cultura ladina, André Comploi, y al team de coordinaziun, ala direturia dl Museum Ladin Katy Moling y a so team, sciöche ince al diretur dl Istitut Cultural Ladin Jürgen Runggaldier y a dötes les colaboradësses y i colaboradus, che cun gran dediziun á fat garaté chësc de dediché ala cultura ladina: ara é gnüda tuta sö cun gran entusiasm da döta la comunité, da porsones de vigni eté. I oress ince rengrazié les uniuns culturales ladines che á tut pert ativamënter y che laora vigni de cun impëgn y pasciun por mantigní vis nosc lingaz y nosta identité. Nia inultima ti vál n gran dilan al Comissar dl Govern Vito Cusumano, a mi predecessur Florian Mussner, ai umbolc de Gherdëna y dla Val Badia, y ales tröpes porsones da dötes les valades ladines y da defora, che á tut pert a chësta manifestaziun tan importanta.”

Do le simposium scientifich dl danmisdé, tl Istitut Ladin Micurá de Rü, dediché ai Mic y les liëndes ladines, é la festa jüda inant tl Museum cun n domisdé creatif che á odü la partezipaziun de tröpes assoziaziuns culturales dla Ladinia, cun laborators interatifs y performance de vigni sort. Tratan le Salon cultural, da sëra, á n gröm de auturs, artisć, musizisć y performer ladins podü se mëte en mostra. Le Di dla cultura ladina s’á stlüt jö da sëra tert cun musiga dal vi y aorela cörta.