Cultura ladina: dumandes per cuntribuc nchina ai 31 de dezëmber
Nchina ai 31 de dezëmber possen dé ju tl Ufize Cultura ladina y Junëza dumandes de cuntribut per atività culturela anuela per l ann 2027
BULSAN (USP). La lies, istituzions, fundazions, cumiteies, ënc y cooperatives che se dà ju cun cultura y pieta ativiteies miredes ala grupa linguistica ladina possa fé dumanda de contribut per ativiteies tl ann 2027 pra l Ufize Cultura ladina y Junëza nchina ai 31.12.2026. L formuler de dumanda possa unì desćiarià online sota myCivis. Per pudëi fé dumanda online muessa la associazions avëi danter la mires statuteres na attività culturela tla Provinzia de Bulsan-Südtirol, che sibe davierta al publich y che dure bele almanco doi ani.
La dumandes per proiec culturei, nvestimënc culturei, ativiteies de carater educatif, attività artistica, publicazions y ativiteies de editoria possa unì dates ju dut l ann. Per sauridé la sëuravijion di cuntribuc, dé nfurmazions genereles sun i recuisic, la scadënzes y documentazions da njunté ala dumanda iel unì laurà ora n dumandes y respostes per sustënii finanziel.
Tl ann 2026 à 85 lies mandà al ufize 123 dumandes desvalives ti ciamps dl ert y dla cultura ladina. L’aministrazion publica à sustenì istituzions cultureles y lies, curian spëises per attività ordinera via per l ann, ma nce dajan n contribut per proiec inovatives y publicazions. Pec leteres tla rujeneda ladina y te de plu rujenedes ie unides a se l dé cun i cuntribuc mirei a mantenì y svilupé la rujeneda ladina. I nvestimënc reverda n generel strumënc, guant tradiziunel per lies y njinies che va debujën per realisé atività culturela y artistica.
La Jonta provinziela à assegnà tl ann 2026 de n dut 1.000.000 Euro, chësc sotrissea che l ti vën dat mpurtanza al svilup dla cultura ladina realisà n gran pert cun l sustëni de ulenteres. Chisc finanziamënc à judà a mëter a jì scumenciadives per scuné la mendranza linguistica ladina. De n dut à l ufize chëst ann mpenià 926.400 Euro per contribuc che va a bën dla cultura ladina.
"L’atività de nosta lies y unions cultureles ie fundamentela per l mantenimënt y l svilup dla cultura de nosta mendranza ladina. L ie n plajëi a udëi la varietà y cualità che vën a se l dé. Per la Jonta provinziela, ma nce per mé persunalmënter, iel scialdi mpurtant sustenì i profescionisć y i ulenteres che se dà ju di per di y ann per ann tl ciamp culturel. A d’ëi ulëssi ti rengrazië de cuer y tl medemo mumënt i motivé de lauré inant cun ntusiasm y energía per l bën dla cultura ladina, nce sce la desfidedes burocratiches ie chersciudes ti ultimi ani", nscì l Assessëur per la Furmaziun y Cultura ladina Daniel Alfreider.
"Paradlan cun i ani da dant ie l bilanz per la cultura ladina aumentà tl 2026. Cun l aumënt àn pudù ti dé ala istituzions y lies cultureles na fundamënta de crëta per si atività y tenì cont di custimënc plu auc. Tl medemo mumënt iel stat mesun arjonjer na valivanza di cuntribuc culturei per l'ativiteies y la publicazions che garantësc n sustëni balanzà. Ti ani che vën sperons de slargë ora mo deplù la scumenciadives nterladines y sustenì deplù la cunlaurazion danter la istituzions cultureles ladines y la lies cultureles per renfurzé la cumenanza linguistica y culturela ladina", dij André Comploi, Diretëur per la Furmazion y Cultura ladina.
Per nfurmazions n cont de cuntribuc pudëis cuntaté l Ufize Cultura ladina y Junëza o cialé sun la plata internet Cultura ladina y junëza
red
Documënc da desćiarié
- Per sauridé la sëuravijion di cuntribuc, dé nfurmazions genereles sun i recuisic, la scadënzes y documentazions da njunté ala dumanda iel unì laurà ora n dumandes y respostes per sustënii finanziel. » [PDF 158 kB]
- Atività culturela, Salon culturel pra l Di dla Cultura Ladina ai 19.09.2026 tl Circolo – Lia Mostra d’Ert a Urtijëi cun "tel Tipes" (Foto: US/Circolo – Lia Mostra d’Ert) » [IMG 143 kB]